அரசு ஊழியர்கள் குழந்தைகளுக்கு உயர்கல்வி முன்பணம் உயர்வு: தமிழக அரசு அரசாணை வெளியீடு

தமிழக அரசு ஊழியர்களுக்கு, தங்கள் குழந்தைகளின் உயர்கல்வி கனவுகளை நிறைவேற்ற ஒரு பொன்னான வாய்ப்பை தமிழக அரசு வழங்கியுள்ளது. இதுநாள் வரை வழங்கப்பட்டு வந்த கல்வி முன்பணம், தற்போது இரு மடங்காக உயர்த்தப்பட்டுள்ளது. இந்த அதிரடி அறிவிப்பு, அரசு ஊழியர்கள் மத்தியில் பெரும் வரவேற்பைப் பெற்றுள்ளது.

தமிழக அரசுப் பணியாளர்களின் குழந்தைகள் உயர் கல்வியில் சேர்வதற்கான முன்பணத்தை அரசு வழங்கி வருகிறது. அந்த வகையில் தொழில்கல்வியில் சேர ரூ.50 ஆயிரமும், கலை மற்றும் அறிவியல் கல்லூரிகள், பாலிடெக்னிக் நிறுவனங்களில் சேர ரூ.25 ஆயிரம் என கல்வி முன்பணம் வழங்கப்பட்டு வந்தது.

எவ்வளவு உயர்வு? என்னென்ன திட்டங்களுக்கு?

தற்போது அறிவிக்கப்பட்டுள்ள புதிய மாற்றங்களின்படி, தொழிற்கல்வி (Professional Programmes) படிக்கும் அரசு ஊழியர்களின் குழந்தைகளுக்கு வழங்கப்படும் கல்வி முன்பணம் ரூ50,000-லிருந்து ரூ1,00,000 ஆக உயர்த்தப்பட்டுள்ளது. அதேபோல், கலை மற்றும் அறிவியல் படிப்புகள் (Arts and Science Programmes) மற்றும் பாலிடெக்னிக் படிப்புகளுக்கு (Polytechnic) வழங்கப்படும் கல்வி முன்பணம் ரூ25,000-லிருந்து ரூ50,000 ஆக அதிகரிக்கப்பட்டுள்ளது.

எப்போது முதல் அமல்? யார் யார் பயன்பெறலாம்?

இந்த கல்வி முன்பண உயர்வு 2025-26 கல்வியாண்டு முதல் அமலுக்கு வரும். தமிழக அரசின் அனைத்து வகை ஊழியர்களும் (குரூப் A, B, C மற்றும் D) இந்த கல்வி முன்பண சலுகையைப் பெறலாம். கல்வி கட்டணம் மற்றும் பிற செலவுகள் உள்ளிட்ட உண்மையான செலவினங்களை பொருத்து இந்த முன்பணம் வழங்கப்படும் என்று அறிவிக்கப்பட்டுள்ளது.

முதலமைச்சரின் தொலைநோக்கு பார்வை!

தமிழக முதல்வர் மு.க.ஸ்டாலின், நடப்பு ஆண்டின் சட்டமன்ற கூட்டத்தொடரில் அவை விதி 110-ன் கீழ் இதற்கான அறிவிப்பை வெளியிட்டிருந்தார். அவரது அறிவிப்பைத் தொடர்ந்து, நிதித்துறை இது தொடர்பான அரசாணையை வெளியிட்டுள்ளது.

விதிமுறைகளில் மாற்றம் உண்டா?

கல்வி முன்பணம் வழங்குவதற்கான தற்போதுள்ள விதிகளில் எந்தவித மாற்றமும் இல்லை என அரசு தெளிவுபடுத்தியுள்ளது. ஏற்கனவே உள்ள விதிகளின்படி, கணவன், மனைவி இருவரும் அரசு ஊழியர்களாக இருந்தால், அவர்களில் ஒருவர் மட்டுமே இந்த முன்பணத்தைப் பெற முடியும். ஒவ்வொரு கல்வியாண்டுக்கும் இந்த முன்பண சலுகை வழங்கப்படும். ஆனால், ஏற்கனவே பெற்ற முன்பணம் நிலுவையில் இருந்தால், அடுத்த முன்பணம் அனுமதிக்கப்படாது.

வட்டி இல்லா முன்பணம், சுலபமான வசூல்!

இந்த கல்வி முன்பணம் வட்டி இல்லாதது என்பது அரசு ஊழியர்களுக்கு கூடுதல் சலுகையாகும். பெறப்பட்ட முன்பணம், முன்பணம் பெற்ற மாதத்திற்கு அடுத்த மாதம் முதல், 10 மாத தவணைகளில் சம்பளத்தில் இருந்து பிடித்தம் செய்யப்படும். இந்த கல்வி முன்பண உயர்வு, அரசு ஊழியர்களின் குழந்தைகளின் உயர்கல்விக்கு மிகப்பெரிய ஊக்கமாக அமையும் என்பதில் சந்தேகமில்லை.

இந்த அறிவிப்பை செயல்படுத்துவதற்கான அரசாணையை நிதித்துறை முதன்மைச் செயலாளர் உதயச்சந்திரன் வெளியிட்டுள்ளார். இது, தமிழக அரசு, தன் ஊழியர்களின் நலனிலும், மாநிலத்தின் எதிர்கால தூண்களான இளைஞர்களின் கல்வி மேம்பாட்டிலும் அக்கறை கொண்டுள்ளது என்பதற்கான ஒரு எடுத்துக்காட்டு.